عشر سنوات من الحب لا تكفى ( شهادة )

يناير 88
تقف على محطة 26 فتاة ترتدى جيب كاروه أحمر وجاكت صوف رمادى تنظر !لى ساعاتها .

" ياوردت / النار بتفتح سرتك .. والبحر صافى
                والندا مغبش عينيا "

الساعة تقترب من الواحدة ظهرا . وقفت ما يقرب من ساعتين . ولم يأت . تركب ميكروباص المطرية , يصعد السائق . تتعلق عيناها ( بمشيته المرتبكه , وخطوته السريعة , وشنطته التقيلة اللى مهدلة كتفه )
تنط فرحة : كده أتأخرت ؟ الميكروباص كان هيمشى !

" شميت عروقك والدهب بيفور , وتطير . نساير آخر سفينه رأيتها . جمعت كل مابيا من نشوة وجرحت تحت السره جرح خفيف ."

- ياسلام !
تعرف لو كنت أتأخرت خمس دقايق , والميكروباص مشي , مكنتش شوفتنى .
دا أنت متعرفنيش عنادية وكرامتى على طرف مناخيرى .

" كنت هاعرف اجيبك .. وانتى .. من ريحة اللمون بتدخلى "

يضحكان .
تنظر فى عينيه .

" صافى ..
هل تدرين أننى لا يمكن ياحبيبتى الوحيدة والواحدة أن أكون ضد أى طاقة تشعرين فيها بحرية أكثر .. فحريتك الأكثر هى التى ستمنحنى قدرة على أن أحبك بأكثر حرية ! "

- عندك مكان محدد نروح فيه ؟
أنا النهاردا ملكك . ودينى مطرح ما يعجبك .
- عمرك شفت واحدة تستنى واحد ساعتين .
- امبارح كان رأس السنه , وسهرنا طول الليل . دا أنا حتى جاى من ألف مسكن , حتى شوفى مسرحتش شعرى .
- عندى مكان ع النيل خطير ورخيص .

تتأبط يده . يدخلان .
- على فين يا أنسة ؟
- أنا عضو نقابة , وده خطيبى عندك مانع ؟
- لا أبدا يافندم اتفضلى .
- أنا أسفه . حطيت !يدى فى أيدك وقلت خطيبى عشان هما رخمين وممكن يغلسو علينا .
- المكان رائع والنيل بديع .
  " سيبنى سابح بين أيديك
    سيبنى سابح فى المواجهة
    أبتلى فى النور بضعفى
    عن ملاقاة الشبك . "

- جرسون . عايزة أحلى فطار عندك . واتنين شاى كشرى سكر خفيف و
- مكنتش أعرف أنك جميلة كدا !
  " لو يدور القلب ..دوره
    خارج الطقس المطير
    كنت اسلم جسمى للرعشة الفقيرة
    وانزوى فى شهقة حبيب
    كات حبيبته نفسها ترقص له ... رقصة وأما فردت فى الهوا .. دراعتها .. طارت "

- ياعم .
خدنا ريحك , أنا أجى أيه جنب عينيك الجميلة ولا شعرك الكستنائى , ودقنك الطويلة , عاملى فيها سايح !
- تعرفى .
أن شكلى ده , وبشرتى دى , بتسبب لى مشاكل , كان نفسى تكون بشرتى سمره , وشعرى خشن , أحس أنى مصرى , مش أجنبى "
- يا عمنا .
    ايه التواضع ده ! تعرف أن فيك شبه من وجوه الفيوم !
- أنا من الفيوم .
ولى أخت اسمها صفاء , وساكن فى أم المصريين .
- صدفه , ولا مقصوده ؟
- معرفش أيه اللى خلانى أجى , رغم أنى أتأخرت ساعتين , كان فيه أحساس أنك مستنيانى , طول عمرى بخاف أكون زى الحمام اللى يترمى له الحب وينزل يلقطه , فيقع فى الفخ .
- عشان كدا !
كنت بتهرب من الندوات .
- الفضل يرجع لواحد صاحبى هو اللى لفت نظرى . قاللى : البت صفاء دى حاجه تمس القلب وتمسكك من جوه .
حسيت أنه بيقول اللى جوايا , خفت منه , خصوصا طول الليل فضل يكلم عنك , كأنه يعرفك من زمان , وكنت غيران منه , وعايز أضربه , بس عقابا ليه أكلته أكبر طبق فول ممكن يأكله فى حياته .
- ......
" للبت ريحة تشد
  تسحب مشاعرك للكهوف بالليل
  لحفيف ورق الشجر لحظة طلوع الروح

  وكبرت على غفلة
  واتجوزت
  وخلفت بنت ورا بنت
  وطبيعى
  أن أبوك يخاف عليك وعلى اخواتك من الموت
  أيه اللى حصل دهبرضه نقطة العرق الملعونة اللى بتلمع على ضهر
  ايدى فى أوقات مش هيه

 الواحد
 تعبان وهمدان وماعندوش روح للمناقره
 الواحد
 واقف قدام حالة بكا .. بالملابس الداخلية وجسمه
 مبلول وفاتر
 ومشاعره منعكشه
 اللى أنا وهيه اتفقنا
 نحمى بعض م اللى جاى
 نفدت وعدها معايا
 كنت كاهن صغير
 أعرف بالظبط مكان القلب
 الموت /
            لحظة دوخلنا فى الجوابات الحبيبة
            بلا استئذان
كنك ما عديتش على القهوه ولا شفتنيش بارقص
مع الدراويش
اسمع كلامى يا بدن واقلعنى
اسمع كلامى ياوسيع الملامح
غمض عينيك
وانزل فى هذا البحر
بوش
بوش
بوش
بوشت ؟

أكتوبر 98
             ( عشر سنوات من الحب لا تكفى ! )
دعونا أصقائنا المقربين لزيارة بيتنا المتواضع , والأحتفال معنا بمرور عشر سنوات على زواجنا . ودخل من الباب ضاحكا : " شوفتى ياست توته . كل العيال اختفوا , مجاش حد منهم .
- ياسلام يابوبو , ولا يهمك , يمكن عندهم أعذار , ولا يهمك أنت عندى بالدنيا .
يقترب يضع قبلة على رأسها كما كان يحلو له أن يقبلها .
" كل سنه وأنت طيبة ياتوته , ياميسو , يالولو , يابوبى ياهو , تعال يا حبيبى شوفو جبت لكم أيه شيبسى وبوزو ولبان "
تعرفى ياتوته
لوخدت تفرغ السنه دى كمان يبقى عظيم , تخلصى الرواية .
- تفتكر اللى زينا ياخدو تفرغ تانى ؟ ولا كانت غلطة !

( وحدث ما توقعناه .
  التفرغ ذهب للمحظوظين , والاستثناءات مستمرة , باحثو الأدب الشعبى .. تعرضوا للظلم )

- أنت زعلت يامجدى ؟
- كان نفسى استريح من الشغل , والأطلس , والمكتبة , واعمل حاجه بجد لها معنى "
- يابابا خليك واقعى . أحنا هامشيين .. احنا نهم مين ؟
- بيت وعيال وديون , لكن ولا يهمك خدى اجازة بدون مرتب .
  وأنا فيه وعود أنى امسك سلسلة , أو اشتغل ديسك فى أى جرنال .
- مش أنت يا مجدى اللى يطاطى
- ثقى فيا مره وجربى .
- يا حبيبى العيب مش فيك . العيب فى آلية المصالح المشتركة .
- ياستى , دى كلها صراعات فارغة , وأنا أكبر منها . تصبحى على خير .

يناير 99
         ( حبيبى بوبو )
صباح جميل , على أجمل بوبو فى الدنيا , نفسى أشوف نظرة الحب الباسمة فى عينيك . ولهفة الشوق , وصدرك الذى يتسع فوق ما يجب , أراك جالسا على قهوة السكرية وأنا !لى جوارك , ولم يكن معنا سوى خمس جنيهات أعطاها لك جدك كى تحلق ذقنك وشعرك الذى طال .
فندفعها ثمنا للقهوة والشاى والقرفة باللبن , وتضحك : جدى كل ما يشفنى يقوللى : أيه يامجدى دقنك طويلة ليه أنت زعلان ؟

مايو 99
         ( حبيبى بوبو )
الجميع يسألون عنك . وأتصل بك العديد من الأصدقاء .