داية وماشطة ( قد الناموسة يفرح العروسة )

نشر هذا الحوار فى مجلة الفنون الشعبية العدد84 سنة 2009
00000000000000000000000000000000000
- أزيك ياحاجة !
اهلا وسهلا , انشالله تسلمى من كل رضى .
- ممكن ندردش مع بعض شوية ؟
وماله احنا ورانا ايه , أهو كلام ابن عم حديت .
- تعرفى ايه عن الداية ؟
بيقولو عليها شاطرة وشملوله , وساعات دايه وماشطة , ياعنى مخلصه , وهى اللى بتولد الستات , والماشطة هى اللى كانت بتزوق العرايس قبل الكوافير زمان .
- ياعنى انت فى فرحك جالك ماشطة ؟
الأول جابوا حفافة اللى هى بتعمل الحلاوة وتشيل الشعر من الجسم , ويوم الحنة جت واحدة وزوقتنى والناس كانت بتنقطها وهى بتحط الحنة .
- ايه لون فستان الحنة ؟
أحمر , بمبه , تركواز , كرنبى , لبنى , أى لون غير الأسود ونحط شال على كتف العروسة .
- العروسة زمان كانت بتلبس طرحة ؟
زمان بتحط شال على كتافها ويكون قطيفة وبعدين تحط طرحة .
- العروسة كانت بتحط هدومها فى ايه ؟
صندوق ( صندوق الشوار ) وانا لسه عندى صندوق , مزوق وعليه رسوم عروسة وعريس ( حسن ونعيمة )
- كانت بتحط ايه فى الصندوق ؟
شال قطيفة أزازة عطر شبشب بورده مناديل بؤوية هدومها , والهدايا بتاعة العريس .
- ايه هدايا اللى كان بيجبها العريس ؟
قماش و ريحة , ملبس وطوفى , وده كان فى المواسم والأعياد , ويجيب سبت فيه ( سكر ورز وعلبة حلاوة وممكن دكر بط و وعروسة فى المولد وفاكهة .
- ايه هى المواسم ؟
نص شعبان , 27 رجب , مولد النبى , العيدين .

- ممكن تحكى لنا عن فرح زمان ؟
زمان الحريم هى اللى تختار العروسة ( الأم و الأخت ) ويروحوا بيت العروسة زيارة و وبعدين يروح العريس والرجاله ويقروا الفاتحة ويتفقوا على المهر والشبكة والفش والمؤخر .
- سن العروسة قد ايه ؟
بنت اتناشر تلاتشر سنة أول ماتحيض .
- مش كدا صغيرة ؟
كانوا بيروحو لدكتور الصحة يسننها والبنات كانت زمان بتفور بسرعة ولا فيش علام ولا مدارس تقعد لية ؟
- الشبكة كانت ايه ؟
كردان , حلق , خلخال .
- الدهب 0 الشبكة ) ملك مين ؟
الشبكة دى هدية للعروسة , وكل واحد بيقدم اللى يقدر عليه و وفيه ناس ( أهل العروسة ) بيساهموا عشان الشبكة تبقى كبيرة , لو الشبكة كتبت فى القيمة تبقى مسؤلية العريس , ولو فضلت تبقى مسؤلية أهل العروسة .
- ايه اللى بيكتب فى قائمة العفش ؟
كل حاجة , بتكتب غير المستهلك ( الهدوم ) وفيه ناس بتزود فى سعر المنقولات , والعريس يمضى عليها واتنين شهود .
- ايه هى المنقولات ؟
زمان كان لحاف ومخده وحصيرة وصندوق الشوار والنحاس . وبعد كدا بقى سرير ودولاب وكنبه ومرتبة ولحاف ومخدتين والمونيا . ومع التطور بقى حجرة نوم وغيرة .
- والنهاردا ؟
بقى فيه اجهزة كهربائية وغيره ببقى جهاز العروسة ممكن يوصل 100 أو 150 ألف جنيه حسب .
- ايه الفرق بين شبكة زمان والنهاردا ؟
زمان كانوا بيشرطوا دهب بكذا جرام ونحاس كذا قنطار . النهاردا ممكن العروسة ترضى بدبلة ومحبس مقابل الأجهزة وفيه بيجيب طقم .
- ازاى كانوا بيزفوا العفش ؟
كانوا يجيبوا عربيات كارو ويزوقوها ويرصوا عليها العفش , وعربية مخصوص للحريم , والرجالة تمشى أمام العربيات من بيت العروسة للعريس , ومعاهم المزمار والطبل البلدى , والناس كانت ممكن تنقط العفش , وياخدها الناس اللى بتزف الطبل يعنى وكانوا يمشوا من اليمين للشمال .
- طيب الفرح نفسه ؟
قبل الفرح بكام يوم يودوا العفش ويفرشوا وممكن يطبلوا لحد يوم الحنة . العريس ممكن يدبح ويعمل ليلة ويجيب صييت يغنى و ويوم الفرح نفسه يودوا العشا بتاع العروسة .
- ايه هو العشا ؟
أكل العروسة وزيه لحماتها . وفيه حلة اسمها  (حلة الأتفاق ) فيها دكر بط وجوزين حمام .
- ايه اللى بيحصل يوم الحنة ؟
يجى الحلاق يحلق لعريس والناس تنقط فى صينية ودى يبقى ياخدها الحلاق . وممكن يبقى فيه حد واقف يقول اسم اللى نقط ( فلان الفلانى نقط بكذا ) وساعات العريس هو اللى ياخد النقطة .
- زفة العروسة ؟
زمان كانت العروسة تخش بعد صلاة العصر وتتزف على حصان أو جمل ( جحفة ) أو( تختروان ) والطبل البلدى .
- ليلة الدخلة ؟
كانت الداية بتخش مع العروسة والعريس وامها وحماتها .
يمسكوا العروسة وهو يلف الشاش على صباعه وبعدين كانوا بيلفوا بالشاش البلد كلها وهما بيغنوا , أو يعلقوه على جريدة نخل .
- يغنوا ايه ؟
قولوا لبوها أن كان جعان يتعشى , بنته الشريفة شرفت  الفرشة , ياحرة ورضيتى ليه .
- فيه أنواع لغشاء البكارة ؟
فيه نوع عنابى , كلوة , غربال .
- الشرف شرف مين ؟
وهى بنت شرف ابوها وأخوها . ولما تتجوز يبقى شرف الزوج .
- يوم الصباحية ؟
أم العروسة تصحى بدرى تروح تصحى بنتها وتحميها وتروق البيت وتجهز الفطار .
وزمان كانت بتاخد المياة سخنة فى بسيله . وبعدين يروح الأب والعم والرجالة ينقطوا . ووراهم النسوان بالصوانى والمشلتت .
- العروسة بتقدم ايه للضيوف ؟
كحك وبسكويت وفطرة . وكل واحد ينقط كان ياخد كحك مقابل النقطة .
- ايه هى الفطرة ؟
ملبس و سودانى بلح شيكولاته . والعروسة تحطه فى طبق للضيوف مع الكحك .
- هل كحك العروسة مختلف عن كحك العيد ؟
لأ زيه . بس ديمن يبصوا لكحك العروسه ويعيبوا عليه لومش بسمن بلدى وناعم .
- فيه انواع كحك ؟
فيه عجلة ومدور والست المسدودة .
- نقطة الصباحية مين ياخدها ؟
نقطة العروسة ياخدها الأب عشان ده دين عليه يسدده .
نقطة العريس هو أو ابوه اللى يسدها .
- لو حد له نقطة عند حد ومردهاش ؟
ممكن حد يروح ويطالب برد النقطة لأنها دين لازم يترد . يقول فلان عليك نقطة لفلان ردها .
- فيه نقطة غير الفلوس ؟
ممكن سكر زيت شاى دقيق دبيحة .
- ساعات يقولوا العريس مربوط ؟
آه ممكن حد غيران منه يعمل له عمل يربطه .يروح لشيخ يعمل له تحويطه , حجاب , ويربطه على وسطه و أو يجيب شبكة صياد وسبع رصاصات ويلفهم على وسطه .
- تفتكرى الطلاق سهل ؟
لأ طبعا . دا الواحدة تبقى طافحة الدم وتسكت وتستحمل .
- والنهاردا ؟
بقى سهل . رغم الجواز بقى صعب , عفش ومصاريف .
- ايه السبب؟
ماحدش عايز يستحمل ويتنازل .
- مين اللى يتنازل ؟
الست هى اللى بتستحمل عشان خاطر العيال .
- وهو ؟
يابنتى الأب يطفش والأم تعشش . ياعنى هو يهد وهى تبنى .
- ليه بيرشوا ملح فى الزفة ؟
عشان الحسد . حصوة فى عين الحسود . وساعات يرشوا فلوس قضه أو ملبس . عشان يلهو الناس من النظر .
- أوصفى لى كوشة العروسة ؟
كانوا بيحطوا كنبه بلدى وعليها كرسيين ويزينوا بجريد النخل والورد . والكولبات . والدكك قدام الدار .
- ليه بنشوف جنب العروسة بنت صغيرة فى الكوشة ؟
دى أختها الصغيرة تقعد جنبها عشان لو عازت حاجه .
- ايه هو النسب ؟
النسب ياعنى غريب اصبح منهم وقبل ماتناسب حاسب . يعنى فكر واختار .
- ليه العريس يفضل العروسة بنت ؟
عشان يضمن انه أول راجل . وهو أول بختها ويفرح وهو بياخد وشها .
- لو مش بنت ؟
القيامة تقوم .ممكن العروسة تتقتل وتبقى جرسة وفضيحة وعار .
- مين العروسة الجميلة ؟
البشوشة . اللى زى القمر والمهم الطبع . يقولك : نزلت سوق الجمال   ابحث عن الخفة  لقيت الجمال كتير   بس الرك ع الخفة .
الخفة : هى روح الطيبة الجميلة .
- مين العروسة الوحشة ؟
أو عرقوب , أو بضب .
- أفضل أيام الفرح ؟
الخميس .
- وأيام الأسبوع ؟
عروسة السبت : سودة وبنت عبد
عروسة الحد : دمعتها ع الخد
عروسة الاتنين : الحسن والحسين
عروسة التلات :لا تتهنى ولا تبات
عروسة الاربع : تقعد وتربع
عروسة الخميس : محمد عريس
عروسة الجمعة: ماتنشفلهاش دمعة .
- مين هى العانس ؟
اللى فاتها قطر الجواز . ياعنى تعدى التلاتين .
- فيه عروسه ممكن تعيش مع أهلها ؟
ممكن لوفيه مكان يقولك جوزناها تتاخر راحت وجبته راخر .
- هل الجواز راحة ؟
لأ ز لكنه سنة الحياة .
- بيقولوا ايه ؟
ماتحسبوش يابنات ان الجواز راحه
أول سبوع يابنات خوخة وتفاحة
تانى سبوع يابنات ع السرير مرتاحه
تالت سبوع يابنات ع السكة نواحة
- بتؤمنى ياحاجة بالسحر ؟
طبعا . السحر ذكر فى القرآن
- ازاى نعرف السحر ؟
العجز, المرض . الربط
- فيه أنواع للسحر ؟
فيه سحر اسود , يتعمل على ديل سمكة
- ياعنى ايه شبشبه ؟
الواحدة لو جوزها هجرها وراح لواحدة تانيه تيجى ساعات ادان الجمعة وتمسك الشبشب وتضرب العتبة وتقول : ياعتب ياعتب هات فلان ابن فلانه من عند فلانه بنت فلانه .
- سمعتى عن حجاب المحبة ؟
لو واحدة بتحب واحد تروح لشيخ يعمل حجاب محبة .
- ايه رايك فى الحلام ؟
فيه حلم , وفيه رؤية , وفيه كابوس .
الحلم ده عادى ؟
الرؤية عن آدان الفجر بشرى من الله
الكابوس تحس زى مايكون حد بيخنقك .
- بتعرفى تفسرى أحلام ؟
ساعات حسب الحلم واللى حلمه
ياعنى خلع الضرس . موت .
واللحمة ناية نكد واللبن نكد
الموت فرح العياط فرح الخضار والسمك رزق , الحلق ولد , الدبلة والغويشة بنت و الطفلة فى الحلم الدنيا .
- احكى لى حلم وتحقق ؟
اختى بعد ابويا مامات شافته داخل الدار وواخد جلبيتين وخارج . سألته : رايح فين يابه ؟ قال لها : عايز جلبيتن وخدتهم . بعدها بكام يوم ماتت أخت وبعدها بكام شهر ماتت أخت تانيه , ياعنى خد الجلبيتين .
- فيه عروسة وشها شؤم ؟
آه . ياعنى حماها او حماتها تموت بعد الفرح او قبله .
- ممكن العروسة تطلق ؟
آه . لو تكرر الموت عند أهل العريس . ياعنى ساعات الموت يتلت , ياخد تلاته ورا بعض من نفس العيلة يقولك العروسة دى قدمها وحش أو نحس وممكن تطلق .
- تفتكرى الناس بسهولة تغير عادتها ؟
زمان لأ . كان صعب تقولى لحد ده غلط . النهاردا ممكن .
- طيب ايه رأيك فى الزواج ؟
شرع ربنا وحلال وعشان الناس تكتر .
- هل الناس بتتجوز عشان خلف بس ؟
العيال عزوة وسند واللى خلف مامتش
- تسمعى عند حد مالوش فى الجواز ؟
آه اسمع بيكون منسون .
- والواحدة كانت لو اجوزت زى ده ؟
تخفى على الخبر ماجور , ولا تتكلم .
- لو أكلمت ؟
تطلق .
- هل الجنس كلام فاوغ ؟
الناس ما بتحبش تتكلم فى الموضوع ده . لأنه أعراض ناس .
- سمعتى عن زنا المحارم ؟
قليل والكلام بيبقى متغطى .
- مين الراجل الهلاس ؟
اللى هو بتاع نسوان .
- تسمعى عن الزواج العرفى ؟
زمان لأ . لكن النهاردا بنسمع عنه كتير .
- طيب ليه زاد ؟
البنات كبرت والغلا والشقق قليلة .
- زمان كان الجواز سهل ؟
كانوا بيرضوا بقليلة وممكن الواحدة تتجوز مع حماتها وفى بيت عيلة أو فى أوضة .
- هل بنتك ممكن تتجوز كدا ؟
لأ طبعا . دى جهزت تلات أوض غير الأجهزة
- ايه صفات الرجل الجميل ؟
يكون شلبى وعربى وشهم ويخاف على بيته .
- أنا قصدى الحلاوة ؟
مافيش راجل حلو ياعنى عنيه خضره وشعره اصفر
- هل ممكن الواحدة ترفض جوزها ؟
لو هى مش عايزة تبريه بالحق والمستحق وتتنازل عن العيال .
- ايه هو الشرف ؟
 الواحدة تحافظ على عرضها
- ممكن رجل يشتهى امرأة ؟
آه . وبالذات لو اتمنعت عليه تبقى ياداهية دقى
- هل الحب عيب ؟
لأ. بس محدش بيعلن عنه
 الواحدة تحب بيتها وجوزها .
- شكرا .

                                                  ( الراوية : سعدية محمود - 58 سنة )
                                                   (  تاريخ الجمع أغسطس 2007 )